პოლიტიკური პარტია „ლელოს“ ლიდერი მამუკა ხაზარაძე, საქართველოს ნატოში გაწევრიანებაზე საუბრისას ამბობს, რომ „ასეთი მოუმზადებელი, ჩამოშლილი ეკონომიკითა და კორუფციით არ მიგვიღებენ“.
ამის შესახებ „ლელოს“ ლიდერმა „ტვპირველის“ ეთერში 7 ივნისს განაცხადა.
ხაზარაძე აღნიშნავს, რომ საქართველომ ნატოში გაწევრიანებისთვის ახალი რეგულაციები უნდა შემოიტანოს.
„ნატო რა არის? ბევრს ჰგონია, რომ გაიხსნება ეს კარები და ჩვენ ასეთი მოუმზადებლები, ასეთი კორუფციით, ჩამოშლილი ეკონომიკით მიგვიღებენ. მერე ჩვენ ქართველურად, ფეხი ფეხზე გადადებული ვიცხოვრებთ და ჩვენს მაგივრად იომებენ, ჩვენს მაგივრად ააშენებენ საწარმოებს და ა.შ – ასე არ ხდება.
სანამ ჩვენ, მთელი ჩვენი საზოგადოებრივი პოლიტიკური ცხოვრების ყველა სფეროში, დღესვე არ დავიწყებთ ისე ცხოვრებას პარალელურ რეჟიმში და იმ რეგულაციების შემოტანაში, რაც სჭირდება [ქვეყანას].
კითხვაზე, რა დრო დასჭირდება საქართველოს იმისათვის, რომ მზად იყოს ნატოში გასაწევრიანებლად, ხაზარაძე ფიქრობს, რომ ამისთვის დაახლოებით სამი წელია საჭირო.
„ეს შეიძლება გაკეთებული გვქონოდა აქამდე, დროზე რომ დაგვეწყო. მე ვფიქრობ, ამ დონემდე, რომ მივიდეთ (გააჩნია გეოპოლიტიკურად როგორ გადალაგდება სიტუაცია და როგორი მზაობა იქნება) დაახლოებით სამი წელი დასჭირდება“, – ამბობს ხაზარაძე.
რაც შეეხება კითხვას მეხუთე მუხლთან დაკავშირებით, რომელიც გულისხმობს საქართველოს გაწევრიანებას ნატოში ოკუპირებული რეგიონების გარეშე, ხაზარაძე ამბობს, რომ ასეთ წინადადებას საქართველო უნდა დათანხმდეს.
„ვფიქრობ, თუ ასეთი წინადადება იქნება განხილული, ჩვენ ეს წინადადება უნდა მივიღოთ. მეხუთე მუხლში არ იგულისხმება, რომ ასე ვთქვათ, აფხაზეთი და ცხინვალის რეგიონის გარეშე მოხდება. აქ ლაპარაკია, რომ ის დროებით ოკუპირებულია, მაგრამ აქ გაერთიანება ხდება მთელი შენი ქვეყნის.
ამიტომ ამაზე სპეკულირება, რომ აფხაზეთს და ე.წ ცხინვალის რეგიონს საბოლოოდ დავკარგავთ, ეს არის ტყუილი“, – განაცხადა მამუკა ხაზარაძემ.
რა არის მე-5 მუხლი და რჩება თუ არა ოკუპირებული ტერიტორიები მე-5 მუხლს მიღმა თუ საქართველო გახდება ნატოს წევრი იმ პირობით, რომ ალიანსის მე-5 მუხლი არ ამოქმედდება ოკუპირებულ ტერიტორიებზე, ეს:
არ ნიშნავს იმას, რომ საქართველო ალიანსის წევრი ხდება აფხაზეთისა და სამხრეთ ოსეთის გარეშე;
ეს არ ნიშნავს ოკუპირებული ტერიტორიების დათმობას;
ეს ნიშნავს იმას, რომ იარსებებს დათქმა, რომ ამ კონკრეტულ ტერიტორიებზე, დროებით, კონფლიქტის მშვიდობიანი გზით მოგვარებამდე ერთი კონკრეტული მუხლი არ გავრცელდება.
მსგავსი პრეცედენტი მოხდა 1955 წელს გერმანიის ფედერაციული რესპუბლიკის (დასავლეთ გერმანია) შემთხვევაში – ის სწორედ ასე გახდა ნატოს წევრი, რამაც საბოლოოდ გერმანიის გაერთიანებასაც შეუწყო ხელი.
მაშინ ნატოს წესდება არ ვრცელდებოდა აღმოსავლეთ გერმანიაზე. თუმცა, 1991 წელს, გერმანიის გაერთიანების შემდეგ, ნატოს წესდება აღმოსავლეთ გერმანიაზეც გავრცელდა.
